Danske Filmkritikere (filminik naliliisartut) tunngaviliinerminni ersersippaat Kalaallit Nunaanni Filminstituttip 2026-mi pilersinneqarnera alloriaataasoq annertooq. Minnerunngitsumillu qanoq filmip nunami ataatsimoortitsisinnaasutut inuiattullu kinaassutsimut isumalerujussuusoq ersersillugu.

Nersornaat nunatsinni filmiliortartut sinnerlugit Kalaallit Nunaanni Filminstitutsimi pisortap Inunnguaq Petrussenip tiguaa.

”Inuit maani nikorfaqatikka, soorunalimi aamma nunatsinniittut, tassaapput ukiorpassuarni sukataarlutik nunatsinni filmiliortarnerup silarsuaanik ineriartortitsinikut. Taakkuuppullu qasusuillutik ulapinnermikkut Filminstituttitaarnissatsinnik suliaqarnikut. Ataatsimoorpugut – taakkuullutalu suliaq nangeqqissavarput.”

Nersornaallu pillugu nangippoq:

”Nersornaasiinerup malunnartippaa pissutsit allanngoriartortut. Nersornaat takussutissaavoq nunatsinni filmiliortarnerup ineriartorsimaneranik, qattuneq qaqineqarpoq, neriuullu ikummaqqilluni.”

Nammineerlutalu oqaluttuaatitta saqqummersinnissaat qanoq pingaaruteqartiginersoq pillugu oqaatigivaa:

”Piffissanngorpoq nammineq isiginnittariaatsitsinnik oqaluttuassagut saqqummiunnissaannut. Issiaannarsinnaanngilagummi inuunerput, inooriaaserpullu allaniit takutinneqartoq malinnaaffigerujuuinnassallugu.”

Kalaallit Nunaanni Filminstituttimiit Sær-Bodilimik nersornaasiisoqarneq tassaasorinarpoq isiginiarneqarnitsinnut, filmiliornikkullu ukiuni kingullerni nikeriartoqarsimaneranut takussutissaq. Alloriarneruvorlu siunissamut nammineq oqaluttuarsinnaanngoriartuaarnermut, immitsinnullu aallaaviginerulernissamut, nammineq piumasaqaatitsinnik.