Filmiliorneq aqqutigalugu aningaasarsiorsinnaaneq nukittorsassavarput, taannaannaanngittorli

aamma kalaallit filmiliortartunut atajuartussamik toqqammaviliinissaq pilersillugu,

oqaluttuassaminnik oqaluttuarsinnaatillugit aamma inuussutissarsiutigalugu sulisinnaatillugit –

aaqqissuussinerit aalajangersimasut tulluarsarfigisariaqarnagit, nunanut allaqqinnaanut aamma

suliaqarfiusartunut tulluarsagaanngittunut.

Amerlasuutigummi iluatsittumik suliaqarneq nunani tamalaani malittarisassanit najoqqutassallu

aallaavigineqartarput, taakku aningaasarsiorfiusunut millionilikkaanik innuttaasulinnut,

filmiliornissamut periarfissarujussuit aammalu filmiliornissami atugassarititaasut allaqqinnaat

atuuttarput. Tamakku najoqqutassat Kalaallit Nunaannut piviusorsiortuunngillat.

Allatut eqqarsarnissarput sapiiserfigisariaqarparput. Tapiinissamut, piginnaanngorsaanermut

aamma filmiliornermut nammineerluta qanoq periuseqarnissarput ineriartortissavarput – periutsit

nunatsinnut, oqaatsitsinnut, kulturitsinnut aammattaaq kalaallinit filmilianut unamminartut

periarfissallu allanit allaanerussutaasinnaasut aallaavigalugit.

Filminstitutti nukittooq nunani allani pisarnerattuut aallaavigalugit ilaarlugit iluseqassanngilaq.

Institutti Kalaallit Nunaannit pilersinneqassaaq, Kalaallit Nunaannullu.

Kalaallinut filmiliortartunut aningaasalersueqataagutta, kulturitsinni, kinaassuserput, siunissamilu

oqaluttuassagut aamma pillugit piorsaaqataassaagut. Filmit nuannaarniutaannaanngillat –

oqaluttariaasaavoq, ilusiliisartoq, qanoq immitsinnut isiginerluta, aamma qanoq nunarsuup

isigineraatigut.

Kissaatigaara Kalaallit Nunaanni Filminstitutti filmiliortoqarnikkut maligassiuisuussasoq, kalaallit

oqaluttuaat namminneq ilusilersukkaminnik amerliartortinneqarsinnaasut. Filmiliortoqarneq,

piginnaasat periarfissanik naapitsiffiusut, isumassarsiaqallaqqissuseq sinaakkutanik nukittuunit

tapersersorneqartoq, aammalu peqatigiilluta kalaallit filmiliaasa atajuartussamik

siunissaqalernissaa – allat ilaarsinagit, kisianni nammineq aqqutissarput sananeratigut.